Write Comment     |     E-Mail To a Friend     |     Facebook     |     Twitter     |     Print

ಶ್ರಾವಣ ಮಾಸ ಆರಂಭವಾಗಿ ಹಲವು ದಿನ ಕಳೆದರೂ ಅದ್ಯಾಕೋ ಜನ ನೆಮ್ಮದಿ ಪಡುವಂತಹ ವಿಷಯಗಳೊಂದೂ ಇರಲಿಲ್ಲ. ಒಂದೆಡೆ ರೂಪಾಯಿ ಮೌಲ್ಯ ಕುಸಿತ, ಷೇರುಪೇಟೆ ಪ್ರಪಾತಕ್ಕೆ ಕುಸಿದಿದ್ದು, ಚಿನ್ನದ ಬೆಲೆ ಗಗನಕ್ಕೇರಿದ್ದು, ಕಚ್ಚಾತೈಲ ಬೆಲೆ ದಾಖಲೆ ಪ್ರಮಾಣದಲ್ಲಿ ಏರಿದ್ದು, ಹೀಗೆ ಹಲವು ದಿನಗಳಿಂದ ಬರೀ ಕಹಿ ಸುದ್ದಿಗಳೇ ಮನೆ ಮಾಡಿದ್ದವು. ಆದರೆ ಗುರುವಾರ ಮಾತ್ರ ನಿಜಕ್ಕೂ ಶ್ರಾವಣ ಸಿಹಿ ತಂದಂತಿತ್ತು. ರೂಪಾಯಿ, ಷೇರುಪೇಟೆ ಚೇತರಿಸಿಕೊಂಡು ಹೂಡಿಕೆದಾರರಲ್ಲಿ ಖುಷಿ ತಂದರೆ, ಮತ್ತೂಂದೆಡೆ ಚಿನ್ನದ ಬೆಲೆ ಸುಮಾರು 1500 ರೂ.ನಷ್ಟು ಕುಸಿತ ಕಂಡಿತು. ಕಚ್ಚಾತೈಲ ಬೆಲೆಯೂ ಇಳಿಕೆ ತಂದಿತು.

ನವದೆಹಲಿ: ಬುಧವಾರವಷ್ಟೇ ಡಾಲರ್‌ ಎದುರು ದಾಖಲೆ ಕುಸಿತ ಕಂಡ ರೂಪಾಯಿ ಮೌಲ್ಯ ಸ್ವಲ್ಪಮಟ್ಟಿನ ಚೇತರಿಕೆ ದಾಖಲಿಸಿದ್ದರ ಪರಿಣಾಮವಾಗಿ ಮತ್ತು ಚಿನ್ನ ಸಂಗ್ರಹದಾರರು ಲಾಭಾಂಶ ಮಾರಾಟ ಮಾಡಿದ್ದರಿಂದ ಚಿನ್ನದ ದರ ಗುರುವಾರ ದಾಖಲೆಯ ಕುಸಿತ ಕಂಡಿದೆ. 10 ಗ್ರಾಂ ಚಿನ್ನದ ದರ ದಿಲ್ಲಿ ಮಾರುಕಟ್ಟೆಯಲ್ಲಿ 1575 ರೂ. ಕುಸಿತ ಕಂಡಿದ್ದು, 32,325 ರೂ.ಗೆ ಇಳಿಕೆಯಾಗಿದೆ. ಬುಧವಾರ ಡಾಲರ್‌ ಎದುರು ರೂಪಾಯಿ ಮೌಲ್ಯ 68.80 ಕುಸಿದ್ದಿದ್ದರಿಂದ ಚಿನ್ನ ಪ್ರತಿ 10 ಗ್ರಾಂಗೆ 1,900 ರೂ ಏರಿಕೆ ಕಂಡು, 34,500 ರೂ.ಗಳ ದಾಖಲೆ ಬರೆದಿತ್ತು.

ರಾಷ್ಟ್ರೀಯ ಮಾರುಟ್ಟೆಯಲ್ಲಿ ಶುದ್ಧ ಮತ್ತು ಆಭರಣಗಳೆರಡೂ 1575 ರೂ ಇಳಿಕೆಯಾಗಿದ್ದು, ಆಭರಣ ಚಿನ್ನದ ಬೆಲೆ 32,125 ರೂ. ಆಗಿದೆ. ಇದೇ ವೇಳೆ ಬೆಳ್ಳಿ ದರದಲ್ಲಿಯೂ ಭಾರೀ ಇಳಿಕೆಯಾಗಿದೆ. ಪ್ರತಿ ಕೆ.ಜಿ ಬೆಳ್ಳಿ 2790 ರೂ. ಕುಸಿದಿದ್ದು, 55710 ರೂ. ಆಗಿದೆ.

ಬೆಂಗಳೂರಿನಲ್ಲಿ 920 ರೂ. ಇಳಿಕೆ:
ಇನ್ನು ಬೆಂಗಳೂರು ಚಿನಿವಾರ ಪೇಟೆಯಲ್ಲಿ ಆಭರಣ ಚಿನ್ನದ ದರ 920 ರೂ. ಇಳಿದು 30,080 ರೂ.ಗೆ ಅಂತ್ಯಗೊಂಡಿತು.