Write Comment     |     E-Mail To a Friend     |     Facebook     |     Twitter     |     Print

ಮಂಗಳೂರು:ನ,10. ರಾಜ್ಯ ಸರಕಾರದ ಮಹತ್ವದ ’ಯಶಸ್ವಿನಿ’ ಆರೋಗ್ಯ ವಿಮಾ ಯೋಜನೆಯಡಿ ವಿಮಾ ಪರಿಹಾರ ವಿವಾದಕ್ಕೆ ಸಂಬಂಧಿಸಿ ಮಂಗಳೂರಿನ ಗ್ರಾಹಕರ ವ್ಯಾಜ್ಯ ಪರಿಹಾರ ವೇದಿಕೆಯು ಮಾಜಿ ಮುಖ್ಯಮಂತ್ರಿ ಬಿ.ಎಸ್‌. ಯಡಿಯೂರಪ್ಪ ಮತ್ತು ಸಹಕಾರಿ ಸಚಿವ ಲಕ್ಷ್ಮಣ ಸವದಿ ಅವರಿಗೆ ಡಿಸೆಂಬರ್ 5ರಂದು ಖುದ್ದಾಗಿ ಅಥವಾ ವಕೀಲರ ಮುಖಾಂತರ ನ್ಯಾಯಾಲಯಕ್ಕೆ ಹಾಜರಾಗುವಂತೆ ಆದೇಶ ನೀಡಿ ಸಮನ್ಸ್‌ ಜಾರಿ ಮಾಡಿದೆ.

ಜಿಲ್ಲಾ ಗ್ರಾಹಕ ವ್ಯಾಜ್ಯ ಪರಿಹಾರ ವೇದಿಕೆಯ ಅಧ್ಯಕ್ಷೆ ಆಶಾ ಶೆಟ್ಟಿ ಅವರು ಗುರುವಾರ ಈ ಆದೇಶವನ್ನು ನೀಡಿದ್ದಾರೆ.

ಗುರುಪುರ ವ್ಯವಸಾಯ ಸೇವಾ ಸಹಕಾರಿ ಬ್ಯಾಂಕಿನ ಸದಸ್ಯ ಬೊಂಡಂತಿಲ ಗ್ರಾಮದ ಬೋರುಗುಡ್ಡೆಯ ಲೋಕೇಶ್‌ ಪೂಜಾರಿ ಅವರು ದಾಖಲಿಸಿದ ದೂರಿಗೆ ಸಂಬಂಧಿಸಿ ಈ ಆದೇಶ ನೀಡಲಾಗಿದೆ.

ಯಶಸ್ವಿನಿ ಯೋಜನೆಯನ್ವಯ ವ್ಯವಸಾಯ ಸೇವಾ ಸಹಕಾರಿ ಬ್ಯಾಂಕಿನ ಪ್ರತಿಯೊಬ್ಬ ಸದಸ್ಯರೂ ಕಡ್ಡಾಯವಾಗಿ ಈ ಯೋಜನೆಯ ಸದಸ್ಯರಾಗ ತಕ್ಕದ್ದು. ಅದರಂತೆ ಲೋಕೇಶ್‌ ಪೂಜಾರಿ ಅವರು ಯೋಜನೆಯ ಸದಸ್ಯರಾಗಿದ್ದು, ಅವರು, ಅವರ ಪತ್ನಿ ಮತ್ತು ಮಗು ಸೇರಿದಂತ ಮೂವರೂ ಈ ಯೋಜನೆಯಡಿ ವಿಮಾ ವ್ಯಪ್ತಿಗೆ ಒಳಪಡುತ್ತಾರೆ.

2011ರ ಫೆಬ್ರವರಿ 13ರಂದು ಲೋಕೇಶ್‌ ಪೂಜಾರಿ ಅವರ ಮಗು ಅಸೌಖ್ಯದ ನಿಮಿತ್ತ ಮಂಗಳೂರಿನ ಅತ್ತಾವರ ಕೆಎಂಸಿ ಆಸ್ಪತ್ರೆಗೆ ದಾಖಲಾಗಿದ್ದು, ಅಲ್ಲಿ ಮಗುವಿಗೆ ಯಶಸ್ವೀ ಶಸ್ತ್ರಚಿಕಿತ್ಸೆ ನೆರವೇರಿಸಲಾಗಿತ್ತು.

ಬಳಿಕ ಗುಣಮುಖ ಹೊಂದಿ ಮಾರ್ಚ್‌ 9ರಂದು ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಗಿತ್ತು. ಆಸ್ಪತ್ರೆಯ ವೈದ್ಯಕೀಯ ವೆಚ್ಚ 60,000 ರೂ. ಆಗಿದ್ದು, ಯಶಸ್ವಿನಿ ಯೋಜನೆಯನ್ವಯ ವಿಮೆ ಇರುವುದರಿಂದ ಬಿಲ್‌ ಪಾವತಿಗಾಗಿ ಲೋಕೇಶ್‌ ಪೂಜಾರಿ ಗುರುಪುರ ವ್ಯವಸಾಯ ಸೇವಾ ಸಹಕಾರಿ ಬ್ಯಾಂಕಿಗೆ ಕೋರಿಕೆ ಸಲ್ಲಿಸಿದ್ದರು. ಬ್ಯಾಂಕು ಈ ಯೋಜನೆಯ ಏಜಂಟ್‌ ಮಾತ್ರ; ಆಸ್ಪತ್ರೆ ವೆಚ್ಚ ಭರಿಸಲು ತಾವು ಬಾಧ್ಯಸ್ಥರಲ್ಲ ಎಂದು ಹೇಳಿ ಬಿಲ್‌ ಪಾವತಿಗೆ ಬ್ಯಾಂಕಿನ ಅಧಿಕಾರಿಗಳು ನಿರಾಕರಿಸಿದ್ದರು ಮತ್ತು ’ಯಶಸ್ವಿನಿ ಕೋ- ಆಪರೇಟಿವ್‌ ಫಾರ್ಮರ್ಸ್‌ ಹೆಲ್ತ್‌ ಕೇರ್‌ ಟ್ರಸ್ಟ್‌’ ಈ ವಿಮಾ ಯೋಜನೆಯನ್ನು ಜಾರಿಗೊಳಿಸಿದೆ.

ಮಾಜಿ ಮುಖ್ಯಮಂತ್ರಿ ಬಿ.ಎಸ್‌. ಯಡಿಯೂರಪ್ಪ ಅವರು ಈ ಟ್ರಸ್ಟ್‌ನ ಮ್ಯಾನೇಜಿಂಗ್‌ ಟ್ರಸ್ಟಿ ಹಾಗೂ ಸಹಕಾರ ಸಚಿವ ಲಕ್ಷ್ಮಣ ಸವದಿ ಅವರು ಟ್ರಸ್ಟಿಯಾಗಿದ್ದಾರೆ. ಹಾಗಾಗಿ ಅವರು ಈ ಬಿಲ್‌ ಮೊತ್ತ ಪಾವತಿಸಲು ಬಾಧ್ಯಸ್ಥರು ಎಂದು ಬ್ಯಾಂಕಿನ ಅಧಿಕಾರಿಗಳು ತಿಳಿಸಿದ್ದರು.

ಈ ಹಿನ್ನೆಲೆಯಲ್ಲಿ ಲೋಕೇಶ್‌ ಪೂಜಾರಿ ಅವರು ಮಂಗಳೂರಿನ ವಕೀಲ ಕೆ.ಎಸ್‌.ಎನ್‌. ರಾಜೇಶ್‌ ಅವರ ಮೂಲಕ ಮಾರ್ಚ್‌ 30ರಂದು ಬ್ಯಾಂಕಿಗೆ ನೋಟಿಸ್‌ ಕಳುಹಿಸಿದರು. ಜೂನ್‌ 28ರಂದು ಇದಕ್ಕೆ ಉತ್ತರಿಸಿದ ಬ್ಯಾಂಕು ’ಕೇಸು ಹಾಕುವುದಿಲ್ಲ ಎಂದು ಮುಚ್ಚಳಿಕೆ ಬರೆದು ಕೊಡಬೇಕು. ಇಲ್ಲದಿದ್ದರೆ ವಿಮಾ ಯೋಜನೆಯ ಸದಸ್ಯತ್ವ ರದ್ದು ಪಡಿಸಲಾಗುವುದು’ ಎಂದು ಲೋಕೇಶ್‌ ಪೂಜಾರಿ ಅವರಿಗೆ ನೋಟಿಸ್‌ ರವಾನಿಸಿತು. ಇದನ್ನು ಪ್ರಶ್ನಿಸಿ ಲೋಕೇಶ್‌ ಪೂಜಾರಿ ಅವರು ಜಿಲ್ಲಾ ಗ್ರಾಹಕರ ವ್ಯಾಜ್ಯ ಪರಿಹಾರ ವೇದಿಕೆಯಲ್ಲಿ ದೂರು ದಾಖಲಿಸಿದ್ದರು.

ಪ್ರಕರಣದ ವಿಚಾರಣೆಯನ್ನು ಗುರುವಾರ (ನ. 10) ಕೈಗೆತ್ತಿಕೊಂಡ ವೇದಿಕೆಯ ಅಧ್ಯಕ್ಷರಾದ ಆಶಾ ಶೆಟ್ಟಿ ಅವರು ದೂರುದಾರ ಲೋಕೇಶ್‌ ಪೂಜಾರಿ ಅವರಿಗೆ ಒಟ್ಟು 85,000 ರೂ. (60,000 ರೂ. ಆಸ್ಪತ್ರೆ ಬಿಲ್‌, 20,000 ರೂ. ಪರಿಹಾರ ಹಾಗೂ 5000 ರೂ. ನ್ಯಾಯಾಲಯದ ಖರ್ಚು ವೆಚ್ಚ) ಪರಿಹಾರ ಮೊತ್ತ ಪಾವತಿಸಬೇಕು ಹಾಗೂ ಮಾಜಿ ಮುಖ್ಯಮಂತ್ರಿ ಬಿ.ಎಸ್‌. ಯಡಿಯೂರಪ್ಪ ಮತ್ತು ಸಹಕಾರ ಸಚಿವ ಲಕ್ಷ್ಮಣ ಸವದಿ ಅವರು ಡಿ. 5ರಂದು ಖುದ್ದಾಗಿ ಅಥವಾ ವಕೀಲರ ಮೂಲಕ ನ್ಯಾಯಾಲಯಕ್ಕೆ ಹಾಜರಾಗಬೇಕು ಎಂದು ಆದೇಶಿಸಿದರು.

ವಕೀಲ ಕೆ.ಎಸ್‌.ಎನ್‌. ರಾಜೇಶ್‌ ಅವರು ಲೋಕೇಶ್‌ ಪೂಜಾರಿ ಪರವಾಗಿ ವಾದ ಮಂಡಿಸಿದರು. ಈಗ ಯಡಿಯೂರಪ್ಪ ಅವರು ಮುಖ್ಯಮಂತ್ರಿಯಲ್ಲ. ಆದರೆ ಈ ಪ್ರಕರಣ ನಡೆಯುವ ಸಂದರ್ಭದಲ್ಲಿ ಅವರು ಮುಖ್ಯಮಂತ್ರಿಯಾಗಿದ್ದರು. ಬ್ಯಾಂಕಿನವರು ಕೂಡಾ ಇದಕ್ಕೆ ಮಾಜಿ ಮುಖ್ಯಮಂತ್ರಿಯವೇ ಬಾಧ್ಯಸ್ಥರು ಎಂದು ತಿಳಿಸಿದ್ದಾರೆ.ಹಾಗಾಗಿ ಅವರನ್ನು ಎದುರುವಾದಿಯನ್ನಾಗಿಸಿ ದೂರು ದಾಖಲಿಸಲಾಗಿತ್ತು ಎಂದು ವಕೀಲ ಕೆ.ಎಸ್‌.ಎನ್‌. ರಾಜೇಶ್‌ ತಿಳಿಸಿದ್ದಾರೆ.

ಈ ಪ್ರಕರಣದಲ್ಲಿ ಒಟ್ಟು 5 ಮಂದಿಯನ್ನು ಎದುರುವಾದಿಗಳಾಗಿ ಪರಿಗಣಿಸಿ ದೂರು ದಾಖಲಿಸಲಾಗಿತ್ತು. ಅವರು ಕ್ರಮವಾಗಿ (1) ಗುರುಪುರ ವ್ಯವಸಾಯ ಸೇವಾ ಸಹಕಾರಿ ಬ್ಯಾಂಕಿನ ಜನರಲ್‌ ಮ್ಯಾನೇಜರ್‌, (2) ಬಿ.ಎಸ್‌. ಯಡಿಯೂರಪ್ಪ , (3) ಲಕ್ಷ್ಮಣ ಸವದಿ, (4) ಮೆಡಿ ಅಸಿಸ್ಟ್‌ ಇಂಡಿಯಾ ಟಿಪಿಎ ಪ್ರೈ.ಲಿ. ಬೆಂಗಳೂರು, (5) ಸಹಕಾರ ಸಂಘಗಳ ಜಂಟಿ ನಿಬಂಧಕರು, ಮೈಸೂರು, (6) ಸಹಕಾರ ಸಂಘಗಳ ಉಪ ನಿಬಂಧಕರು, ಮಂಗಳೂರು, (7) ಸಹಕಾರ ಸಂಘಗಳ ಸಹಾಯಕ ನಿಬಂಧಕರು, ಮಂಗಳೂರು.